2017年7月3日 星期一

香港Fit魷 / 釣魷 教學 (入門到進階)

近排無野撈,又唔番得大陸.....極度得閑,日日唔係 141 釣蟹 就係拉 X哥 班友去釣魚,釣到無朋友.....

無撚聊聊寫BLOG找 J數,分享下釣魷心得,順便塗毒更多新手 !


簡單講講一般 FIT魷 需要D乜裝備



釣魷工具
釣魷工具

 
釣具簡介:


1. 竿   : 一般建議使用釣魷專用嘅魷竿,輕和幼身有利於做動作(岸釣一般用八尺左右)軟硬視乎個人喜好

2. 鮫   : 雙柄(平衡感較好),淺杯(出絲順),同埋輕身(250g以下),一般專用魷攪都會有以上條件

3. 絲   : 由"主線"同"子線"組成,主線會用PE布絲(少伸延性)常用0.8號 0.6號 (4織或8織),子線
透明炭素絲 2號( 耐磨、隱形)1至2米 (PE結 / FG結)

4. 快扣 : 扣姣蝦用,方便快速換蝦

5. 餌木 : 姣蝦(一般用2.5號 / 3號 / 3.5號),不同顏色 和 質感物料,市面上較易買到3.5號,數字細蝦愈細,其實三種尺寸都需要有




fit魷釣組
fit魷釣組

 

其他工具: 

6. 殺魷神經刀 : 人道殺魷,亦有保鮮作用

7. 搭勾 / 撈箕: 中大物時需要使用附助獵物上水

8. 假餌盒袋/蝦套: 放姣蝦  

9. 傘鈎調教器 : 調正 姣蝦傘鈎屈曲
尾針

10. 鉛 : 有時需要加鉛,令蝦快速沉底 或  跳動更貼底





釣魷工具
fit魷工具




有工具釣組之後,講講一般玩法係點

簡單黎講,就係有技巧地控制水中假餌,引誘附近嘅魷攻擊




步驟一. 投出姣蝦後等佢沉到水底 (留意事前要調教好魚攪既磅頂,一般50-80% 拉力),主要係中魷時有瀉力作用避免易甩

步驟二.
蝦沉到底後,收緊多餘虛絲

步驟三. 做動作,常見是連 CHOCK 3下 同時配合收絲動作(重要)兩個環節要同時進行,然後垂竿,(蝦在水底會呈現跳升三下動作)如下圖

步驟四. 等待姣蝦沉到水底後,收緊多餘虛絲(成直線)目的係中魷時你會即時察覺得到),然後等十秒左右(視乎釣法),假設蝦沉到底的時間係十秒,即係加埋要等待二十秒左右

步驟五. 然後再做動作,重覆步驟三和四,直至收到埋岸...

步驟六. 當收到埋岸邊時,唔洗急住收晒,觀察一下有無獵物追尾,係水控跳一兩下,沉底 或 停留在近水面階可,玩幾野後無反應可再重新投竿


 

針墨釣法
大尾魷釣法



咁點先知有無魷上釣呢? 一般會係你等待期間(步驟四)魷會攻擊"攬"你隻蝦,你可能即時感到有野拉 或 (步驟五)再做動作時發覺有異象,咁你就可以向上楊竿!


(步驟六)通常係睇住黎玩,唔洗心急,見到魷游近時可以HOLD住隻蝦唔陏,等佢攬實(拉走隻蝦時)你先輕揪,如果見佢游走,你可輕跳兩下 HOLD住 或 沉底,挑釁佢埋黎....,多累積成功或失敗經驗,手感靠自己摸索



(如中魷時意外甩脫,唔洗急,即時放鬆魚絲,盡量令隻姣蝦留番係甩魷範圍附近,靜待一陣,因為獵物可能好快補飛又再攻擊)




以上係常見基本釣法,熟練以上步驟,其實已經夠玩,當然,進階既竿法可以好多變化,會因應情況靈活運用,例如:等待時間、跳動頻率、幅度等,有機會可以講下....


針墨釣法
針墨釣法






獵物特性:


香港Fit魷,主要係講緊釣大尾魷,當然亦機會釣到: 火箭魷、針墨、八爪魚、墨斗仔 .....



大尾魷
大尾魷特性


大針墨
針墨特性


火箭魷
火箭魷特性


香港EGI
香港EGI





香港Fit魷 大至可分 岸釣(步兵),艇釣兩種,岸釣門檻比較低,一般人比較易接觸得到...

 



魷 步兵 艇釣boatgame
步兵VS  boatgame





知識篇:



1. 釣點選擇:  


香港東水、南水、北水都可fit魷,北水較為熱門,西水因近珠江(水口淡、泥水) 想FIT大尾魷可以忽視。


大尾魷居無定所,會隨食物、水流、安全,交配等因素不斷轉移,有利生存嘅環境自然比較容易聚魷。


一般近岸邊,內灣位、凹位,避流位,沙石灘,多匿藏位,有水草,地理位置上都比較大機會有魷。(水深水淺都可能有魷)




東水 南水 西水 北水
香港 東水 南水 西水 北水

2. 時間季節:天氣



季節:香港一年四季都可Fit魷,只係旺淡季之分,數量尺寸會因天氣、水質、人為因素等影響....

一般情況,夏天魷會較細隻,秋季前後魷量較多亦開始長大,入冬後數量較少,但大隻。春天前已經係尾水,但有機會遇到 BOSS級 SIZE


流水: 生流潮汐起伏較大
相對好釣 ,而潮汐開始漲水到漲定時,魷活躍性較高,好多時會隨水流到岸邊捕食小魚,潮退或退到低點時,明顯無咁好釣。(因釣點而異)


釣 潮汐
潮汐


天氣日夜:


日夜: 日夜其實都可釣魷,比較好時段係天黑(黃昏水) 或 天光(黎明)比較好釣,(個人比較鐘意玩夜水)特別係夏天


晴雨: 一般流傳嘅講法係,落雨不利釣魷,有太陽比較好釣,相信同水淡和海水溫差有D影響


風向: Fit魷睇"風"十分重要,大風會吹動絲線,影響蝦下沉和水中的姿態,虛線較多易亂,手感不清,比較難玩

微風 或 三、四級風適合fit魷,四五六級適合放風箏.....特別係季候風(東北風、北風),冬天多數日子風大,所以事前必須留意! 當然,風勢亦要視乎釣點地理位置,山勢障礙物等,食風情況而定


 

天氣異常: 氣壓高低,天氣異常轉變都好有影響,天氣即將轉差時 或 天氣差了一段時間轉好時,經常出現爆釣情況(常見夏季發生)

  
 

其他因素影響:   附近有漁民作業
水中有獵食性魚類、水質污染、紅潮滅族濫捕.....地震、火山爆發、核試、UFO......都會對釣況有直接影響





殺魷
殺魷





實戰篇: (困難應對)
 

1.  尋釣點: 香港地方細但釣點都唔少(下篇會專門介紹香港釣點),就算熱點都有好景不常時候,所以收風十分重要!

一般釣友情報 / 論壇 / FB群組 / Whatsapp群組 都係釣友間收風既途徑。

-實地考察: 去到一個釣點,觀察地上墨蹟都可略知一二釣況,當然, 有D人會好有公德洗埋個地先走 (但垃圾飯盒就周圍亂掉...XD)

-自尋釣點祕位(自私釣) 大膽試位,少競爭,當然要注意自身安全


2.  時機  : 好多時見老手偷釣一兩個鐘都滿載而歸,原因係識把握時機(撇除釣點因素),Fit魷 黎明 黃昏,生流前後,潮漲到漲滿漲定時,都係岸釣嘅好時機,魷餓剛隨流埋岸搵食時,更加係黃金時間。




餌木加鉛
餌木 姣蝦 加鉛



3.  大風  : 大風係Fit魷常遇嘅逆境,岸釣而言,盡量將竿頭貼近水面,減少風吹對絲線影響,如果大湧,可用鉛增加姣蝦重量有利沉底同無咁飄,其實風大不宜FIT魷,寧願訓教好過,出艇就更辛苦危險.....


4.  唔開口: 釣點水域明明係有魷,但又唔多肯攬(活性低)時,可能係食物充足(魚毛多)又飽又唔憂食 或 曾受驚戎心重 或 心情唔好 嘅時候,適宜細跳、細動作、甚至唔跳慢拖,耐心等待嘅釣法,因為活性低佢懶得追你,當然 亦可試下換下唔同顏色、尺寸姣蝦.....

一般黎講,水濁或天陰或深場視線較差時,會用鮮艷色(搶眼D)。晴天水清會用天然色,晚上會用有夜光效果姣蝦。


5.  掛底  : Fit魷發覺掛底時唔洗心急,先確定一下係咪中大野?拉唔拉得陏? 如果確定中地球,救蝦方法(岸釣)一般可以鬆下緊下,不同方向角度咁輕CHEK收拉



如果都唔得最後只能一搏HOLD住用力慢慢收緊,一係斷絲,一係傘勾曲針,睇你好唔好彩。當然,好多掛底情況都係可以憑經驗去避免。.....如果釣點多石易掛,就應該有填海心理準備 識得用平蝦.....
 

補充一下保育問題:

香港釣界一般會流傳釣到細魚,細魷放生嘅講法。理據係 咁細條無肉食 或者釣晒細嘅,邊仲有大野釣。

客觀去睇: 一隻有生育能力既()雌性魷魚每次可以產過百粒卵,魚類就更多,所以真正要保育放生嘅,其實係()雌性魷魚,殺一隻等於殺過百條細魷.....

經常係唔同群組或者朋友圈會見到,鬧人唔放生果班正義道德撚,自己釣到()時,大隻少少都絕對唔會放生,釣到細隻如果有人知道就放,無人見到就唔放....,呢D雙重標準真係一流...XD


另外,艇釣
對保育影響更大,因為每次都會橫掃唔同釣點,經常會出現滅族情況,但出艇幾條友每人夾幾舊水,唔釣番夠本又非常洩底.....,結果影響艇家同釣具鋪生意XD


如果走一轉街市魚檔,會發現大魚細魚,公乸乜都有....,華人社會其實講乜春保育呀....唉


我就從來唔會理人地放生定唔放生因為人地釣到,佢想點咪點囉....,如果真係有心保育做好自己本份,用行為去影響其他人,而唔係靠把口做偽善既道德撚。

 
(利申: 我近年釣到乜都放生,唔係因為情操高尚,只係因為懶得劏
懶得處理,過下手癮就算。)




好撚攰.....寫住咁多先,得閑介紹下香港釣魷熱點 同埋一D 秘位釣點







.

溝女教學 -入門到進階 < 食女攻略>



夜場茍芸慧 ( 遊樂場打野戰!! )

11 則留言:

  1. 有人話月圓會冇魷釣,請教師兄有冇此事?

    回覆刪除
    回覆
    1. 你指月圓意思係農曆十五??十五係生流正日,夜水我親身爆過唔少次.....

      刪除
    2. 唔該晒,我可以唔理果條友了

      刪除
    3. 想問下一篇 有嗎?

      刪除
  2. 賓哥,呢排仲有無上去?

    回覆刪除
  3. 師兄巴打頭先一炮過睇哂你個Blog,真係好好睇!! 唔寫多D真係哂左!

    回覆刪除