上回講到我噴完隻 美女手辦 之後，順手噴埋(淘)番離嘅 RX-93高達胸像
上篇內容重溫 http://playbenchau.blogspot.hk/2015/06/blog-post_2.html
盒面寫住台灣製造.....係咪老翻就自行判斷，價錢方面:百幾蚊加埋運費(大概 200元港幣)，除左個盒同說明書雞雞地之外，其它驟眼望落，無乜異樣
呢盒RX93高達胸像，主要賣點係對眼同埋頭頂 有LED燈裝置，咁第一時間試試 LED，是咪真係僥著光先.....
仆街，真係僥著喎
於事跟說明書 剪剪砌砌，部野話難唔難，話易唔易，簡單組裝一下，都花左兩個鐘時間，是咪我太耐無玩呢....
(其實對一般新手黎講 部野組裝應該屬於中上難度左右)
砌左個型，覺得件野都柒柒地，好似堆垃圾....，有少少想放棄嘅念頭，但又唔想半途而廢，不如去痾篤屎 散一散心，調整下一自己心情.....
痾完番黎覺得心情好左好多，睇完組裝效果後，心裡有數大概點上色，開始動手拆散、打磨分組，準備好上色前期工作
(上色方面 呢件野都係屬於普通難度，因為主要得幾隻色，組件又唔多，其實無乜難度.....)
上色前花少少時間介紹下，砌模型 一般需要乜春工具 (對工具有認識嘅朋友可直接跳過)
1.剪 刀 鉗 水貼
剪、刀、鉗唔洗解釋啦，至於水貼其實就好似貼紙，令模型生色不少，內文遲少少會試範一次點用
另外為配合水貼使用，有時可能用到(水貼膠水 同埋 水貼軟化劑 附助) 兩種我都無實物係手，因為比較少用，不過都可講下
水貼膠水: 可以防止日後水貼容易破損，有保護作用
而水貼軟化劑 用途係令貼紙平滑，特別係水貼面積大，貼 唔係好平面嘅地方時，貼紙好易會出現摺紋，所以需要用到
2.打磨機 沙紙(水磨) 固體畢地
水磨沙紙 其實之前(手辨篇)都有提到，留意要先用粗沙紙,再用幼沙磨(一般600CW-1200CW 號數越大沙紙就越幼細) 五金店都買到
打磨機，如果成日玩模型就建議買黎用，因為比用沙紙磨快好Q多，而且可以鑽孔用途
固體畢地主要係修補模型凹凸既地方，或者填補接縫 空隙，補完後再用沙紙打磨，上色後就唔覺有痕跡
3.模型油/顏色 開/洗油水 油性針筆
模型油其實有分 油性 同 水性，如圖係(油性)，油性比較快乾，而且附著力同埋覆蓋力都比水性好，所以基本上我唔會用水性.....
開油水/洗油水: 使用模型油時，基本上一定要開稀先可以用，開油水最好用番同牌子嘅專用溶液，因為化學成份嘅野 大家識條鐵咩，所以都係只能信佢 (溫馨提示:洗油水同模型油都係易燃物品，唔好一唔煲煙一路噴油)
油性針筆
模型線筆: 可以加強 或 特出模型細節 或 層次輪廓，一般用油性為主，細線會用到 005 (砌高達比較多人喜歡畫線/滲線.....)
4.模型色碟 毛筆 竹支夾
色碟: 用途好廣，有備無患，甚至可以用黎煲蠟.....
毛筆: 自己覺得國產毛筆十分好用，而且容易買，內文後少少會試範點樣用黎貼 水貼.....
竹支夾: 夾住散件上色風乾用
5.噴筆 / 電氣泵
噴筆: 上色必備用品(除非手油上色)，我覺得噴筆主要分別係 (噴嘴口徑)嘅大細，我自己有兩支，一支粗噴用，一支噴精細用.....
氣泵: 用噴筆一定要用到電氣泵，因為過程係要將顏色氣化噴出，(當然都可以用罐裝氣體而唔用電氣泵，不過常用就唔太化算)
不得不提，買電氣泵時，要留意有無水隔配件，你都唔想噴噴下顏色，突然好似條女潮吹噴水.....
6.模型膠水 / AA膠
AA膠: 如圖你只見到 AA膠，其實玩模型唔建議用AA膠，因為錯左好難番轉頭，不過好易買到
模型膠水: 通常都會用(雙星)模型專用果種，我用開果支失左踪.....
7.水畢地 遮蓋紙
水畢地: 又名噴灰，或 噴底色，模型噴底色我好少會咁做，一般因為用畢地修補模型凹凸或者填補接縫 空隙，然後噴層水畢地，上色後就唔覺有痕跡.....
遮蓋紙: 黃色膠紙，遮蓋唔想上到色嘅位置，就好似填色唔好填出界咁上下，手辨比較常用
8.抽風設備: 上色要留意室內空氣流通，其實只要做到將噴色時嘅天拿水味抽走就OK,如圖山寨抽氣機.....
番黎現場，散件分組後開始上色，用噴筆上色其中一個優點係可以輕易噴出均勻陰影效果，不過散件我都係噴成(實色)
只係頭部白色(線位)噴左層深灰色，再冚層白色，因為我唔太喜歡畫線，所以用陰影去突出部份細節位.....
唔洗一陣就噴完，開始組裝，留意砌嘅過程要盡量避免刮花已上色嘅零件
當然，我就示範左點樣一路砌，一路係咁刮花D顏色.....
好唔容易大概砌好左個型，睇落同之前未上色嘅分別都幾明顯
最後一步就係玩水貼.....
等等! 呢舊乜撚野黎? 點解嘅.....? (睇左3分鐘都唔知屬於邊部份.....)
水貼其實唔只一種，如圖呢種對新手黎講有少少難度
今次我就示範點樣用毛筆撚 水貼
因為水貼比較易爛，用毛筆嘅好處係夠精細同柔軟，唔會整爛水貼，而且毛筆配合紙巾可以吸收水貼多餘水份，呢招好多模型達人都未試過.....
文字表達，不如睇片
水貼貼邊到其實可以自由發揮，重點係(美感)，又或者參考一下出色嘅作品，個人覺得 唔好人地比幾多水貼你，你就貼幾多.....
可以一提，件野個底座其實都幾柒，得閒會換番個鏡面底座，感覺可能煥然一新
好唔容易，又完成一件劣作，今次暇疵比上篇(露底少女)更多，玩模型手辨其實都係離唔開一個字.....(心機)!
記得細個都係由高達模型開始玩，由用(手油)到用噴筆，由 模型 玩到 手辨，由 手辨 到玩實景模型.....始終自己對人物同實景比較情有獨鍾
實景模型其實都幾廣泛，可以係機械人+實景，又可以係一D情景模型，總之就偏向模擬寫實，但講到實景就不得不提軍事情景模型
今次我就推介 Commandos 2 俾大家參考下，Commandos 2 唔係模型而係一隻自己以前好沉迷嘅 PC GAME，內容場景對(軍事情景模型)有好高嘅參考價值，有興趣嘅朋友可以睇睇
https://www.youtube.com/results?search_query=commandos+2
深圳 水立方 邪骨
沒有留言:
不接受新意見。