自從香港輸入外勞，地盤散工越來越唔好做，所以幾年前自己躺平考左個的士牌。(有錢就北上吃喝玩樂，無錢洗就返香港租車踩幾更，自由自在又有冷氣歎...)
間中開工會撞到舊工友，問得最多就係的士好唔好搵? 咁難你都考到嘅? (唔知係串我定讚我)
心諗:我真係有料就去考大車搵大錢，洗撚揸的士咩....
其實考的士話難唔難，話易唔易，見得閑簡單講解下... (想入行既工友們自己睇唔好再問我)
的士牌照考試基本要求:
-年滿 21 歲
-有私家車 或 貨Van 駕駛執照，1年或以上 (棍波自動波都得)
-無嚴重違例紀錄：申請前 5 年內，無觸犯過危險駕駛引致他人死亡、醉駕、藥駕等指定嘅嚴重交通罪行
步驟 一：交申請同排期
上網用(智方便+)遞交商用車輛駕駛考試申請表 (TD321) 畀 500蚊考試費。完成後就會收到運輸署的考試排期信。
步驟 二：筆試 (我考果陣2023年)
甲部：的士則例（20題四選一，啱 17題或以上）
乙部：地方及路線試題（20題三選一，啱17 題或以上，包含醫院、景點、酒店等核心地點及最直接路線選擇
丙部：道路使用者守則（35題三選一，啱30 題或以上）
(最難考就係乙部，要死記地方同路線，我都肥過兩次)，但2025年改左易考D，話導航科技發達為由大幅簡化題目...。
2026年後最新合併甲、乙兩部分:
甲部：的士營運 ，共有 40 題(要答啱 34 題)
乙部：道路使用者守則，共有 35 題(要答啱 30 題)
甲乙部同時合格就過關 (屌你其實易左好多)，但筆試合格後仲未揸得住...
步驟三：修讀的士職前課程，課程大概16個鐘，兩三日就讀完
步驟四：筆試合格後3 年內，以及讀完職前課程證書後1年內，就可申請攞到的士牌（6號牌）
有牌就可以租車搵食:
一般會租紅色的士 或 綠色的士 (主要睇你住邊，次要睇你怕唔怕塞車...)
日更大概( 早5:00 至 17:00)
夜更大概( 17:00至 5:00 )
特更（一手車）：一個人租足 24 個鐘（自己決定休息時間）租金貴D，自由度大D (但唔太適合新手)
( P.S : 唔建議加入的士車隊，唔想解釋..... )
(我自己通常租紅的夜更，成本較低、排隊又可瞓覺，執兩支大旗基本唔洗蝕，夜晚揸車特別爽.....
(做街客 / Order / Uber)
而新手每次租車有三樣一定要注意:
1.保險墊底費:（俗稱:大墊底）唔同車行租車前必須問清楚：如果發生交通意外，司機最高要承擔幾多墊底費？(間間可能唔同)
2.驗車同劃痕記錄：每日接車時（特別係同上一更司機交更時），要圍繞車身檢查一次。用手機影低車身有無刮花、凹痕，以及車胎、車燈狀況。否則退車果陣，車行可能會將舊傷扣喺你按金上。
3.入油/入氣規矩：行規係「行幾多、入幾多」，即交更前必須將油/氣缸入滿交畀下一更。
咁到底揸的士每日可以搵幾多?
扣除租車 + 入油 + 台費 (未計抄牌)
忠忠直直既話....每日大概少過一千蚊收入，同做地盤比一定搵得少好多，但叫做無咁辛苦同自由...
( 聲明: 本人只有 Blog網誌 和 Youtube頻道，(任何以 PlayBenChau名義，出現在其他社交平台例如:FB / 微信 / TG / whatsapp ...等，都是冒充，敬請留意! ! )
Fit魷教學 (入門到進階)
沒有留言:
張貼留言